សំណួរចាក់ស្រេះរបស់សិស្សដែលទើបប្រលងទី១២ភាគច្រើន គឺប្រហែលជា «តើខ្ញុំគួររៀន អ្វីនៅមហាវិទ្យាល័យ?»។ សិស្សខ្លះបានគិតរួចជាស្រេចនូវអ្វីដែលត្រូវរៀន ក្រោយប្រឡងជាប់ បាក់ឌុប ប៉ុន្តែសិស្សខ្លះទៀតប្រឡងហើយនៅមិនទាន់ដឹងថា ខ្លួនគួររៀនអ្វីទេ។
ទួន សិរីរតនា អាយុ១៧ឆ្នាំ សិស្សថ្នាក់ទី១២នៃវិទ្យាល័យជាស៊ីមសាមគ្គី ដែលទើបនឹង ប្រលងចប់ បាននិយាយថា «ខ្ញុំនឹងរើសយកជំនាញ ប្រព័ន្ធផ្សព្វផ្សាយ និងសារគមនាគមន៍នៅ សាកលវិទ្យាល័យ។ មុននឹងសម្រេចចិត្ត ខ្ញុំបានសួរខ្លួនឯងថា ខ្ញុំចូលចិត្តធ្វើអ្វីជាងគេ ហើយខ្ញុំបាន ចាប់អារម្មណ៍ថាពេលចាប់ផ្តើមប្រើ ហ្វេសប៊ុក (Facebook) ខ្ញុំចង់ចេះសរសេរ រាយការណ៍ រឿងរ៉ាវព្រឹត្តិការណ៍ផ្សេងៗអោយមិត្តភក្តិដឹងដោយមានច្បាស់លាស់ ទើបខ្ញុំសម្រេចចិត្តថានឹងរៀនជំនាញ នេះ។ មានគេប្រាប់ធ្លាប់ប្រាប់ខ្ញុំថា ខ្ញុំនឹងមិនមានអនាគតល្អ បើសម្រេចចិត្តយ៉ាងនេះ ពីព្រោះខ្ញុំជាស្រី ហើយការងារនេះតែងតម្រូវអោយមានការលះបង់ និងព្យាយាមខ្ពស់ ប៉ុន្តែខ្ញុំគិតថា វាមិនមានបញ្ហាទេពីព្រោះខ្ញុំរៀនអ្វីដែលខ្ញុំស្រឡាញ់ ហើយខ្ញុំនឹងអាចជំនះបាន។»
នេន សែន អាយុ២១ មកពីខេត្តតាកែវ និស្សិតឆ្នាំទី៣នៅភ្នំពេញ កាលពីឆ្នាំ ២០១០ ក៏បាន ប្រាប់កម្មវិធីយើងផងដែរថា «ដំបូងខ្ញុំបានចាប់យកជំនាញផ្នែកសេដ្ឋកិច្ចនៅ សាកលវិទ្យាល័យ ភូមិន្ទនីតិសាស្រ្តនិងវិទ្យាសាស្រ្តសេដ្ឋកិច្ច។ ប៉ុន្តែមួយឆ្នាំក្រោយមក ខ្ញុំបានផ្លាស់ប្តូរមុខជំនាញមកផ្នែក សិក្សាអន្តរជាតិ នៅវិទ្យាស្ថានភាសាបរទេសវិញ។ កាលខ្ញុំរៀននៅស្រុកកំណើត ខ្ញុំអត់ ទាន់មានអ៊ីនធីណេតប្រើប្រាស់ ហើយមិនសូវបានទទួលពត៌មានឲ្យបានគ្រប់គ្រាន់អំពីមុខវិជ្ជាដែល ខ្ញុំរៀន និងចូលចិត្តឡើយ។ ចំពោះអនាគតការងារ ខ្ញុំចង់ធ្វើការក្នុងអង្គការសហប្រជាជាតិ ហើយ បំណងមួយទៀតគឺ ប្រឡងចូលរៀននៅ សាកលវិទ្យាល័យភូមិន្ទរដ្ឋបាល។»
ស៊ុន ពន្លឺ អាយុ២៤ឆ្នាំ អតីតនិស្សិតនៃវិទ្យាស្ថានបចេ្ចកទេសកម្ពុជា បានរម្លឹកថា «ខ្ញុំមិន បានរំពឹងគិតថានឹងជ្រើសរើសសាលានេះទេ។ ខ្ញុំគ្រាន់តែដឹងថា ខ្លួនខ្ញុំចូលចិត្តរៀនមុខវិជ្ជាទាក់ទង នឹងវិទ្យាសាស្រ្ត ហើយពេលនោះមកគ្រូៗខ្ញុំ បានណែនាំគាត់អោយស្គាល់សាលានេះ។ ខ្ញុំជាអ្នក ស្រុកសៀមរាប ហើយបានមកភ្នំពេញនៅឆ្នាំ២០០៦ ដើម្បីរៀនផ្នែក វិស្វកម្ម។ ខ្ញុំទទួលស្គាល់ថា ការរៀនផ្នែកវិស្វកម្មនៅវិទ្យាស្ថានពិតជាលំបាក ជាពិសេសនៅឆ្នាំទី១ដែល ទើបតែចូលរៀន ប៉ុន្តែ នៅឆ្នាំបន្ទាប់ៗ ខ្ញុំបានយល់ច្បាស់អំពីការសិក្សានិងយល់នូវអ្វីដែលគួរធ្វើដើម្បីទទួលបានលទ្ធផល ល្អ។ កាលនៅរៀននោះដែរ ខ្ញុំបានដឹងជាស្រេចនូវអ្វីដែលខ្ញុំចង់ធ្វើ នៅពេលរៀនចប់ គឺវិស្វករ ផ្នែកជនបទ។ បីខែមុនពេលរៀនចប់ អ្វីៗដែលខ្ញុំបានរំពឹងទុកបានក្លាយទៅជាការពិតនៅពេល ដែលខ្ញុំត្រូវបានគេហៅអោយទៅធ្វើការក្នុងក្រុមហ៊ុនសំណង់មួយ។ ការងារជាវិស្វករពិតជា នឿយហត់ និងចំណាយពេលច្រើន ប៉ុន្តែចំពោះខ្ញុំ ខ្ញុំយល់ឃើញថាធ្វើកាន់តែច្រើនគឺយល់ដឹង កាន់តែច្រើន។»
បើអ្នកមិនទាន់សម្រេចចិត្តច្បាស់លាស់ ពីជំនាញដែលត្រូវរៀននៅឡើយ អ្នកអាចពិនិត្យមើលជំនាញផ្សេងៗ មុខវិជ្ជាខ្លះៗនៃជំនាញ និងការងារដែលពាក់ព័ន្ធ ខាងក្រោមនេះបាន៖
មុខជំនាញ
|
ពត៌មានទូទៅ
|
ការងារក្នុងថ្ងៃអនាគត
|
| ប្រព័ន្ធផ្សព្វផ្សាយ និងសារគមនាគមន៍ | សិក្សាលើមុខជំនាញមួយចំនួន ទំនាក់ទំនងនិងប្រព័ន្ធផ្សព្វផ្សាយ ដូចជាការផលិតកម្មវិធីវិទ្យុ ទូរទស្សន៍សរសេរព័ត៌មាន និងជំនាញទំនាក់ទំនងសាធារណៈ | អ្នកកាសែត, មន្ត្រីទំនាក់ទំនង, អ្នកផលិតកម្មវិធីទូរទស្សន៍, និងវិទ្យុ, និពន្ធនាយក, អ្នកវិភាគ, និង សាស្រ្តាចារ្យជាដើម |
| ផ្នែកទេសចរណ៍ | សិក្សាលើមុខវិជ្ជាដែលទាក់ទងនឹង ការស្រាវជ្រាវសង្គម និងវប្បធម៌ សេដ្ឋកិច្ច ការវិភាគទូទៅ ជាដើម | មន្ទីរក្រសួងរដ្ឋ ដូចជា ក្រសួងទេសចរណ៍, អង្គការសង្គមស៊ីវិល ក្រុមហ៊ុនទេសចរណ៍ សណ្ឋាគារ ជាដើម |
| ចិត្តវិទ្យា | សិក្សាទៅលើជំនាញចិត្តវិទ្យា និងចិត្តសាស្ត្រសង្គម | ក្រសួងសង្គមកិច្ច, អង្គការ មិនមែន រដ្ឋាភិបាល ដែលជួយសម្រួល ដល់ជនរង គ្រោះផ្នែកចិត្តសាស្រ្ត។ |
| វិទ្យាសាស្រ្តកុំព្យូទ័រ | សិក្សាលើជំនាញ គ្រប់គ្រងទិន្នន័យ ការគូររូបលើកុំព្យូទ័រ ប្រព័ន្ធកុំព្យូទ័រ ការគ្រប់គ្រង បណ្តាញ សរសេរកម្មវិធីឬគេហទំព័រអ៊ីនធឺណិតជាដើម | សេវាកម្មសម្រាប់អតិថិជន ខាងផ្នែកធ្វើ គេហទំព័រ, គ្រប់គ្រងប្រព័ន្ធ និង ការរៀបចំរចនាបថសម្រាប់ទិន្នន័យ ជាដើម។ |
| វិស្វកម្ម | សិក្សាលើមុខជំនាញវិទ្យាសាស្ត្រពិត ដូចជាវិស្វកម្មសំណង់ស៊ីវិល វិស្វកម្មជនបទ វិស្វកម្មឧស្សាហកម្មនិងមេកានិច វិស្វកម្ម ធនធានរ៉ែនិងថាមពល វិស្វកម្មខាងអគ្គិសនី ថាមពលនិងទូរគមនាគមន៍ និងវិស្វកម្ម ខាងចំណីអាហារ | វិស្វករ មន្ត្រីរដ្ឋាភិបាល, អង្គការក្រៅរដ្ឋាភិបាល,ដែលពាក់ព័ន្ធ និងក្រុមហ៊ុនវិស្វកម្មផ្សេងៗ។ |
| វិទ្យាសាស្ត្រាសុខាភិបាល | សិក្សាលើជំនាញវិជ្ជសាស្រ្តលើផ្នែកជំងឺទូទៅទន្តសាស្រ្ត ជំងឺកុមារជាដើម | វេជ្ជបណិ្ឌត ក្នុងផ្នែកដូចជា ទន្តសាស្រ្ត, ជម្ងឺទូទៅ ជម្ងឺកុមារ ជម្ងឺស្រ្តី, និង ខាងវះកាត់ជាដើម។ |
| ជីវវិទ្យា | ជីវវិទ្យាជាមុខជំនាញសម្រាប់សិស្សដែលចាប់អារម្មណ៍និងស្រឡាញ់ ធម្មជាតិសត្វនិងរុក្ខជាតិ | កន្លែងពិសោធន៍, កសិដ្ឋាន ជីវសាស្រ្ត, កន្លែងផលិតអាហារឬថ្នាំពេទ្យ, អង្គការបរិស្ថាន, ក្រសួងបរិស្ថាន និងក្រុមហ៊ុនផ្សេងៗ។ |
| បរិស្ថាន | សិក្សា យ៉ាងលម្អិត អំពីបរិស្ថាន ប្រព័ន្ធជីវជម្រុះ សត្វ រុក្ខជាតិដែលទាំងអស់នេះនឹងធ្វើអោយនិស្សិត មានការយល់ដឹងអំពីគ្រោះថ្នាក់និងផលប៉ះពាល់ដែលអាចកើតមានមកឡើងបរិស្ថាន | អង្គការបរិស្ថាន, ក្រសួងបរិស្ថាន និងសាលារៀន ជាដើម។ |
| ភាសាអង់គ្លេស | សិក្សា អំពីវេយ្យាករណ៍ ការសរសេរ ការអាន នៃភាសាអង់គ្លេស ភាសាអង់គ្លេសសម្រាប់ការទំនាក់ទំនង ភាសាអង់គ្លេស ការ បកប្រែ និងភាសាអង់គ្លេសសំរាប់ជំនួញ | ស្ថាប័នរដ្ឋ និងឯកជន, ការបកប្រែ ការបង្រៀន និង ការធ្វើជំនួញ |
| ភាសាកូរ៉េ | រៀនផ្តោតសំខាន់ទៅ លើ វប្បធម៌ សង្គម អក្សរសាស្រ្ត និងជំនួញនៃជនជាតិកូរ៉េ | ក្រុមហ៊ុនកូរ៉េ, អ្នកបកប្រែ ក្រុមហ៊ុនទេសចរណ៍, និង កន្លែងណាដែលត្រូវការភាសាកូរ៉េជាចាំបាច់ |
| ភាសាជប៉ុន | រៀនអំពីការប្រើប្រាស់ភាសាជប៉ុនទាំងការនិយាយ ការសរសេរ និងការស្តាប់ | ក្រុមហ៊ុនទេសចរណ៍ អង្គការជាតិ និង អន្តរជាតិ និង ក្រុមហ៊ុនជប៉ុន |
| ភាសាបារាំង | សិក្សាយ៉ាង លម្អិតអំពីការប្រើប្រាស់ភាសាបារាំងជាពិសេសក្នុងវិស័យ ទេសចរណ៍ និងបង្រៀន | នៅតាមភ្នាក់ងារ ឬក្រុមហ៊ុនទេសចរណ៍ ក្រុមហ៊ុន អង្គការ សាលារៀន |
| ភាសាចិន | សិក្សាអំពីភាសាចិនក្នុងការអប់រំជំនួញពាណិជ្ជកម្មនិងទេសចរណ៍ ទស្សនវិជ្ជាបុរាណចិន ការសរសេរអក្សរនិងរបៀបរបបរស់នៅក្នុងសង្គមចិនសម័យទំនើប | ក្រុមហ៊ុនទេសចរណ៍ ក្រុមហ៊ុនជំនួញមកពីចិន អ្នកបកប្រែ ឬក៏ គ្រូបង្រៀន |
No comments:
Post a Comment