​មិន​ត្រឹម​តែ​ជា​​​មហាអំណាច​សេដ្ឋកិច្ច​​ លេខ​​មួយ​លើ​ពិភពលោក​​ អាមេរិក​​ក៏​ត្រូវ​បាន​គេ​ទទួល​ស្គាល់​ថា ជា​មហាអំណាច​​យោធា​​ឈាន​មុខ​គេ​នៅ​លើ​លោក​​ខាង​បច្ចេកវិទ្យា​សព្វាវុធ​​ដ៏​ ទំនើប​បំផុត​នៅ​ក្នុង​សតវត្ស​​ទី​ ២១​ នេះដែរ។ សមត្ថភាព​យោធា​​ប្រកប​ដោយ​សក្ដានុពល​​នេះ បាន​ធ្វើ​ឲ្យ​អាមេរិក​​ទទួល​បាន​ជោគជ័យ​ស្ទើរ​​តែ​​គ្រប់​សមរភូមិ​សង្គ្រាម​ ទាំងអស់​ មិន​ថា​តាម​ផ្លូវ​គោក ផ្លូវ​ទឹក​ ឬ​ផ្លូវ​អាកាស​​​​នា​ពេល​កន្លង​មក។
សូម​​មើល​កម្លាំង​​យោធា​​​របស់​អាមេរិក​​តាម​ផ្នែក​នីមួយៗ​គិត​ត្រឹម​ឆ្នាំ​២០១២៖
ស្ថានភាព​កម្លាំង​កងទ័ព
ក្នុង​ចំណោម​ប្រជាជន​សរុប​​​ប្រមាណ ៣១៣,៨​ លាន​នាក់ ​(២០១២) អាមេរិក ​មាន​ប្រជាជន​ពេញ​វ័យ​​ជាង ​១៤៥,២លាន​​នាក់ និង​មាន​ចំនួន​ប្រជាជន​ជាប់​កាតព្វកិច្ច​យោធា​ជាង​ ១២០លាន​​នាក់។ ទន្ទឹម​នឹង​នេះ​ យុវជន​ដែល​ដល់​អាយុ​បំពេញ​កាតព្វកិច្ច​យោធា​មាន​ចំនួន​ជាង ​៤,២​លាន​នាក់ ខណៈ​ដែល​​កងទ័ព​សកម្ម​ជួរមុខ​​​ និង​ ​កងទ័ព​សកម្ម​បម្រុង​មាន​ចំនួន​ប្រហាក់ប្រហែល​គ្នា ពោល​គឺ​​​ប្រមាណ​ជាង ​១,៤​លាន​នាក់​។

កង​ទ័ព​ជើងគោក
មហាអំណាច​យោធា​មួយ​នេះ​ មាន​​រថក្រោះ​ចំនួន​ ៨៣២៥​គ្រឿង ហើយ​ក្នុង​នោះ​ក៏​មាន​រថក្រោះ​ពិឃាដ​ដ៏​មាន​សក្ដានុពល​នៅ​សមរភូមិ​ដែល​​​ជា​ សមិទ្ធផល​​​ចុងក្រោយ​បំពាក់​ដោយ​បច្ចេកវិទ្យា​ទំនើប​​របស់​ខ្លួន​​ប្រភេទ ​M1 Abrams ​ផង​ដែរ។ ក្រៅ​ពី​នេះ​នៅ​មាន​រថពាសដែក​ចំនួន​ ១៨.៥៣៥​គ្រឿង​កំពុង​ត្រៀម​ខ្លួន និង​ត្រូវ​បាន​ប្រើប្រាស់​នៅ​លើ​សមរភូមិ​ជា​ច្រើន​នៅ​ពេល​កន្លងមក។​​
រថក្រោះ​ពិឃាដ​ដ៏​មាន​សក្ដានុពល​M1 Abrams​
កាំភ្លើងធំ​ប្រភេទ​អូស​សណ្ដោង
​ទន្ទឹម​​គ្នា​នេះដែរ​ អាមេរិក​នៅ​មាន​កាំភ្លើង​ធំ​​នាំមុខ​ចល័ត ​១៩៣៤​គ្រឿង កាំភ្លើងធំ​ប្រភេទ​អូស​សណ្ដោង​ចំនួន ​១៧៩១​គ្រឿង ប្រព័ន្ធ​បាញ់​គ្រាប់​រ៉ុកកែត​ច្រើន​កាណុង (MLRS) ១៣៣០​គ្រឿង រួម​ទាំង​ចំនួន​កាំភ្លើងត្បាល់​ប្រមាណ​ជា​ ៧៥០០​គ្រឿង​។ ក្រៅ​ពី​នេះ ខ្លួន​នៅ​មាន​សព្វាវុធ​ប្រឆាំង​រថក្រោះ​ ២៨.០០០​គ្រឿង និង​យាន​ជំនិះ​ដឹក​ជញ្ជួន​កងទ័ព​ជើងគោក​​ចំនួន ១០៦.៤០៧​គ្រឿង​ថែមទៀត​ផង។​​​​
កងទ័ព​ជើង​អាកាស
នៅ​ពេល​បច្ចុប្បន្ន អាមេរិក​មាន​យន្តហោះ​ចម្បាំង​សរុប​ប្រមាណ​​ជា ១៥.២៩៣ គ្រឿង​ដែល ​ក្នុង​នោះ​ក៏​​មាន​យន្តហោះ​​បំបាំង​កាយ​ ​B-2 និង​យន្តហោះ​ Drone ដ៏​មាន​សក្ដានុពល​និង​មាន​ប្រសិទ្ធភាព​បំផុត​​​ដែល​អាច​ហោះហើរ​រាប់​ម៉ឺន​ គីឡូម៉ែត្រ​ដោយ​មិនបាច់​ចុះចត​​​។ ក្រៅ​ពី​នេះ ​ប្រទេស​នេះ​នៅ​មាន​​​​ឧទ្ធម្ភាគចក្រ​​​ចំនួន ​៦ ៦៦៥​គ្រឿង​​​កំពុង​ត្រៀម​ខ្លួន និង​បាន​ធ្វើ​ប្រតិបត្តិការ​​​យ៉ាង​សន្ធឹកសន្ធាប់​​នៅ​ក្នុង​សង្គ្រាម​អាហ្វហ្គានីស្ថាន និង​អ៊ីរ៉ាក់។
យន្តហោះ​ Drone គ្មាន​មនុស្ស​បើក​​មាន​ប្រសិទ្ធភាព​បំផុត​​​ក្នុង​ការ​វាយប្រហារ
កងទ័ព​ជើងទឹក
​​ងាក​មក​កងកម្លាំង​ជើង​ទឹក​វិញ អាមេរិក​មាន​នាវា​យោធា​ចំនួន ២៩០​គ្រឿង នាវា​ផ្ទុក​យន្តហោះ ​១១គ្រឿង ​នាវា​ចម្បាំង​បុរាណ​ប្រភេទ Frigates ចំនួន​២៤​គ្រឿង​​ និង​​​នាវា​ពិឃាដ ​​៦១​គ្រឿង​។ ក្រៅ​ពី​នោះ ​នៅ​មាន​នាវា​មុជទឹក​ដ៏​ទំនើបៗ​បំផុត​ចំនួន​ ៧១​គ្រឿង នាវា​ល្បាត​តាម​ឆ្នេរ​ចំនួន​ ១២​គ្រឿង រួម​ទាំង​នាវា​បង្កៃ​គ្រាប់មីន​ចំនួន​ ១៤គ្រឿង​ និង​នាវា​បើក​លើ​ទឹក​និង​លើ​គោក​ប្រមាណ​ជា​ ២៨​គ្រឿង​ផ្សេង​ទៀត។
លើស​ពី​នេះ ​​គេ​ក៏​មិន​ត្រូវ​​មើល​រំលង​ដែរ​ថា ​អាមេរិក​​នៅ​មាន​​​គ្រាប់​រ៉ុកកែត មីស៊ីល​ទំនើបៗ​ដែល​​បំពាក់​ដោយ​បច្ចេកវិទ្យា​នាំ​ផ្លូវ​​​​​​​មិនថា​​ជើងគោក ជើង​អាកាស​ និង ជើងទឹក​​​ឡើយ​។ ​អ្វី​ដែល​កាន់​តែ​​ពិសេស​ និង​​ស្ដាប់​ទៅ​គួរឲ្យ​ខ្លាច​ទៀត​នោះ មហាអំណាច​មួយ​នេះ​ក៏​មាន​អាវុធ​ប្រល័យលោក​នុយក្លេអ៊ែរ​​ប្រមាណ​ ៧៦៥០​គ្រាប់​​ ដែល​មាន​​អនុភាព​​ខ្លាំង​ជាង​​​​គ្រាប់​នុយក្លេអ៊ែរ​ទម្លាក់​នៅ​ជប៉ុន​ក្នុង ​សង្គ្រាម​លោក​លើក​ទី២​ រាប់​សិប​ដង​ទៅទៀត​ផង។ ទោះ​ជា​យ៉ាង​នេះ​ក្ដី​​ ​តាម​ការ​លើក​ឡើង​ពី​អ្នក​វិភាគ​មួយ​ចំនួន​​​ឱ្យ​ដឹង​ថា​ អាមេរិក​​ចូល​​ចិត្ត​សំញែង​ឱ្យ​ពិភពលោក​បាន​ឃើញ​បែប​នេះ​​ ​តែ​សត្រូវ​​​​​​ក្នុង​​សម័យ​សង្គ្រាម​ត្រជាក់​​គឺ រុស្ស៊ី​ក៏​មិន​ណយ​ដែរ។ រង់​ចាំ​តាម​ដាន​ជា​មួយ​ Sabay ពី​កម្លាំង​សព្វាវុធ​រុស្ស៊ី​នៅ​ពេល​ក្រោយ៕ ​
​​​​​ប្រែសម្រួល៖ Narin
ប្រភព៖ globalfirepower & cnn & wikipedai