ឈឺចាប់: ស្គាល់ក្រុងខ្មែរនៅអាមេរិកទេ?

Tuesday, September 17, 2013

ស្គាល់ក្រុងខ្មែរនៅអាមេរិកទេ?

Cambodia Town (ទីក្រុងខ្មែរ) គឺជាឈ្មោះផ្លូវការរបស់វិថីមួយដែលមានចម្ងាយប្រហែលជាង ១ គីឡូម៉ែត្រក្នុងទីក្រុងឡងប៊ិច រដ្ឋកាលីហ្វ័រញ៉ា សហរដ្ឋអាមេរិក។ ទីក្រុងឡងប៊ិចត្រូវបានប្រជាជនកម្ពុជាប្រសិទ្ធិនាមឲ្យថា ជា “ទីក្រុងភ្នំពេញទី ២” ដោយសារនៅទីនោះសម្បូរទៅដោយប្រជាជនខ្មែររស់នៅ យ៉ាងច្រើនកុះករ។ Cambodia Town មានភោជនីយដ្ឋាន ហាងលក់សំលៀកបំពាក់ ហាងលក់គ្រឿងអលង្ការ ប្រាសាទ វត្តអារាម និងសេវាកម្មផ្សេងៗជាច្រើនទៀតដែលគ្រប់គ្រងដោយជនជាតិអាមេរិកសញ្ជាតិដើមខ្មែរ។

ព្រះសង្ឃកំពុងប្រសិទ្ធីស្លាកទីក្រុងខ្មែរ

ជាទីក្រុងខ្មែរនៅទឹកដីអាមេរិក ទីក្រុងឡងប៊ិច ត្រូវគេជឿជាក់ថា មានប្រជាជនខ្មែររស់នៅប្រហែល ៥ ម៉ឺននាក់។ គេជឿថា វាជាទីក្រុងធំបំផុតទីពីរដែលមានខ្មែរអាណិកជនរស់នៅច្រើនជាងគេ បន្ទាប់ពីទីក្រុងប៉ារីសរបស់បារាំង។ ប្រជាជនកម្ពុជាដែលរស់នៅទីក្រុងឡងប៊ិចភាគច្រើនជាជនភៀសសឹកនៅ ជំនាន់ប៉ុល ពត។ ទីក្រុងខ្មែរមួយនេះ តែងប្រារព្ធធ្វើពិធីបុណ្យចូលឆ្នាំខ្មែរដង្ហែតាមដងវិថីរៀងរាល់ ឆ្នាំ។

ប្រវត្តិការដាក់ឈ្មោះ Camdodia Town

ចាប់តាំងពីឆ្នាំ ២០០១ មក សកម្មជនខ្មែរដែលរស់នៅទីក្រុងឡងប៊ិច បានទាមទារឲ្យមានការដាក់ឈ្មោះច្រករបៀងវិថី Anaheim ថា “Cambodia Town” (ទីក្រុងខ្មែរ) ខណៈសកម្មជនដទៃទៀតស្រឡាញ់ឈ្មោះ “Little Phnom Penh” (ទីក្រុងភ្នំពេញទីពីរ)។ រហូតដល់ថ្ងៃទី ២៥ តុលា ឆ្នាំ ២០០៦ ទើប ក្រុមប្រឹក្សាទីក្រុងឡងប៊ិចសម្រេចបោះឆ្នោតរយៈពេល ៩០ ថ្ងៃដើម្បីទទួលយកព័ត៌មានបន្ថែម និងពិនិត្យមើលឲ្យបានល្អិតល្អន់។ ចុងបញ្ចប់ ការទាមទារពីសកម្មជនខ្មែរបានទទួលជោគជ័យ ដោយក្រុមប្រឹក្សាទីក្រុងឡងប៊ិចសម្រេចដាក់ឈ្មោះ Cambodia Town ជាផ្លូវការនៅថ្ងៃទី ៣ កក្កដា ឆ្នាំ ២០០៧។

វិស្វករកំពុងដំឡើងស្លាកទីក្រុងខ្មែរ

នៅព្រឹកថ្ងៃបន្ទាប់កាសែត Long Beach Press-Telegram បានចុះផ្សាយពីការទទួលស្គាល់ជាផ្លូវការថា “បន្ទាប់ពីការពិភាក្សាដ៏វែងឆ្ងាយ និងទទួលមតិពីសាធារណៈ ក្រុមប្រឹក្សាទីក្រុងបានបោះឆ្នោតក្នុងការដាក់ឈ្មោះច្រករបៀង វិថី Anaheim ដែលស្ថិតនៅចន្លោះរុក្ខវិថី Junipero និងមហាវិថី Antlantic ថា ជា “Cambodia Town” (ទីក្រុងខ្មែរ) ដោយសំឡេងគាំទ្រ ៨ ទល់នឹង ១។ តំបន់ទាំងមូលជាទីតាំងជំនួញដ៏សម្បូរបែបរបស់ប្រជាជនអាមេរិក ដើមកំណើតខ្មែរ និងជាលំនៅឋានរបស់ប្រជាជនខ្មែរប្រហែល ១៧០០០ នាក់។