និយមន័យនៃការនិយាយ

តើការនិយាយគឺជាអ្វី? ការនិយាយ គឺជាការស្តែងចេញនៃការប្រើប្រាស់ភាសា។ ការនិយាយ គឺជាការបញ្ចេញនូវអារម្មណ៍។ ការនិយាយ គឺជាដំនើរការនៃការទំនាកទំនងរវាងមនុស្សម្នាក់ទៅមនុស្ស ម្នាក់ឬមនុស្សមួយក្រុមដែលមានភាសា​សំលេង អាកប្បកិរិយាជាប្រព័ន្ធ ទំនាក់ទំនង។ ការនិយាយ គឺជាឧបករណ៍ទំនាក់ទំនង ដែលមានអានុភាពខ្លាំងបំផុត ក្នុងលោក។ ការនិយាយ គឺជានិមិត្តសញ្ញានៃការយល់រវាងមនុស្សនឹងមនុស្ស។ ការនិយាយ គឺជាដំណើរការផ្ទេរនូវការយល់ឃើញនិងទិន្នន័យផ្សេងៗ អោយដល់អ្នកស្តាប់។ ការនិយាយ​ គឺជាសកម្មភាពរួមគ្នានឹងការស្តាប់ ដែលជាប្រតិកម្មតបត ហើយដើម្បីអោយបានផលល្អជាទីពេញចិត្តនោះ គួរមានគោលការណ៍និង សិល្បៈប្រកបផង។ ការនិយាយ គឺជាក្លោងទ្វារឆ្ពោះទៅរកជោគជ័យឬបរាជ័យ។ ការនិយាយ គឺជាវត្ថុមានសារៈសំខាន់ក្នុងជីវិត។ការនិយាយដែលល្អ នឹងធ្វើអោយការទាក់ទង ការពិភាក្សាឬការបញ្ចេញយោបល់បានជោគជ័យ។ ការនិយាយ គឺជាធាតុសំខាន់ក្នុងការទាក់ទងគ្នាផ្សេងៗ តាមការពិត​ អ្នកណាក៏អាចនិយាយបានដែរ។ ប៉ុន្តែពេលនិយាយហើយ​ តើនឹងបាន លទ្ធផលយ៉ាងណា?​ តើជាទីគាប់ចិត្តឬទេ? ទើបជាកត្តាសំខាន់។ ការនិយាយបានល្អ និយាយអោយអ្នកដ៏ទៃដឹងអំពីគោលបំណងរបស់អ្នក និយាយនោះ មិនមែនជារឿងដែលធ្វើបានដោយងាយៗនោះទេ។