ទៅលេង​កោះ​ឋានសួគ៌ ​Seychelles​

ប្រសិនបើបាននឹកគិតទៅដល់ឆ្នេរសមុទ្រដ៏ស្រស់បំព្រងនោះ អារម្មណ៍នៃក្តីសប្បាយរីករាយ ក៏ហាក់ដូចជាផុស ចេញមកភ្លាមៗតែម្តង ហេតុនេះហើយបានជាយើងចង់នាំអារម្មណ៍អ្នកអានទៅកម្សាន្តនៅតំបន់មួយដែលប្រជុំ ទៅដោយកោះដ៏ស្រស់ស្អាតជាច្រើននៅ Seychelles វិញម្តង។ Seychelles គឺជាប្រទេសដ៏តូចមួយស្ថិត នៅក្នុងមហាសមុទ្រឥណ្ឌា ដែលសម្បូរទៅដោយប្រជុំកោះជាច្រើន។ ពេលដែលអ្នកបាន ទៅ ដល់ Seychelles អ្នកពិតជាទទួលបាននូវអារម្មណ៍ថ្មីសន្លាងមួយ ដែលអ្នកពិបាករកបាននូវទីកន្លែងផ្សេងទៀត ដោយសារតែ ទីនោះ សម្បូរទៅដោយទីកន្លែងល្បីៗ និងស្រស់ស្អាតជាច្រើន ដែលអ្នកត្រូវទៅកម្សាន្ត។ នៅពេលដែលអ្នកបានទៅកម្សាន្ត និងទស្សនានូវ ទេសភាពដ៏ស្រស់ត្រកាល ដែលមានតែមួយគ្មានពីរនៃរមណីដ្ឋានធម្មជាតិដ៏ស្រស់ បំព្រងមួយនេះរួចហើយនោះ អ្នកពិតជាមិនចង់ ត្រឡប់មកវិញនោះទេ។ ទីកន្លែងកម្សាន្តសំខាន់ៗព្រមទាំងសម្បូរទៅដោយ ភ្ញៀវទេសចរដ៏ច្រើនកុះករមានដូចជា៖
១- កោះ Mahe គឺជាកោះដ៏ធំជាងគេនៅ Seychelles ហើយក៏ជាទីកន្លែងដែលមានចំនួនប្រជាជនរស់នៅច្រើនជាង គេផងដែរ។ ទៅដល់ទីនោះអ្នកអាចទស្សនាតំបន់ល្បីៗជាច្រើនដូចជា ប៉ននាឡិការរបស់ក្រុង Victoria សារមន្ទីប្រវិត្តិសាស្ត្រជាតិ Codevar Craft Centre ជាកន្លែងដែលអ្នកអាចទិញវិត្ថុអនុស្សាវរីយ៍ដ៏ច្រើនសម្បូរបែប សារមន្ទីប្រវិត្តិសាស្ត្រធម្មជាតិ ឧទ្យានធម្មជាតិ ឆ្នេរ Beau Vallon ដែលជាឆ្នេរធំជាងគេនិងល្បីល្បាញជាងគេនៅក្នុងទឹកដីកោះ Mahe នេះហើយអ្នកក៏អាចទៅទស្សនាទេសភាពនៃកោះ និងតំបន់ទេសចរណ៍ល្បីៗផ្សេងទៀត ដែលមាននៅលើកោះដ៏ធំនេះផងដែរ។
២- កោះ La Digue គឺជាកោះធំជាងគេ ស្ថិតក្នុងចំណាត់ថ្នាក់ទី៤ នៅក្នុងចំណោមប្រជុំកោះទាំងឡាយនៅក្នុងទឹកដី Seychelles។ កោះនេះត្រូវបានគេទទួលស្គាល់ និងនិយមទៅសម្រាកលំហែកាយនៅទីនោះ ដោយសារតែខ្សាច់នៅលើកោះនេះមានភាពម៉ដ្ឋទន់ ពណ៌សក្បុស គឺជាប្រភេទខ្សាច់ដែលស្រស់ស្អាតខ្លាំងណាស់។
៣- កោះ Aldabra Atoll ជាកោះដែលសម្បូរទៅដោយផ្កាថ្មជាង គេបំផុតមួយនៅក្នុងចំណោមកោះផ្កាថ្មធំៗបំផុតក្នុងពិភពលោក។ នៅពេលអ្នកបាននៅទស្សនានៅលើកោះមួយនេះ សូមកុំឱ្យរំលងការមុជទឹកមើលផ្ការថ្មដ៏ស្រស់ស្អាត និងមើលពពួកមច្ឆា ព្រមទាំង ពពួកមានជីវិតនៅ ក្រោមបាទសមុទ្រដ៏រស់រវើក និងសម្បូរបែបគួរឱ្យចង់ទស្សនា និងស្វែងយល់ក្រៃលែង។
លើសពីនេះទៅទៀត ទីប្រជុំកោះ Seychelles ក៏នៅមានកោះនិងឆ្នេរសមុទ្រជាច្រើនទៀតដែលអ្នកទេសចរអាចទៅលើលំហែកាយ និងទៅកម្សាន្តដើម្បីស្រូបយកខ្យល់អាកាសបែបធម្មជាតិពិតៗដូចជាកោះ Curieuse, កោះ moyenne, កោះ Silhouette, កោះ Ste Anne និងទីកន្លែងកម្សាន្តជាច្រើនទៀត៕

ផែនទីប្រទេស Seychelles

ទេសភាពកោះ Mahe

ទេសភាពកោះ La Digue

ទេសភាពកោះ Aldabra Atoll

ទេសភាពកោះ Curieuse

ទេសភាពកោះ Moyenne

ទេសភាពកោះ Silhouette

ទេសភាពកោះ Ste Anne