Óប្រវត្តិ
កាលពីឆ្នាំ 1865 វិស្វករខាងរុករករ៉ែលោក Fredrik Idestam បានបង្កើតក្រុមហ៊ុនផលិតក្រដាស Groundwood Pulp Mill នៅក្បែរច្រាំងទន្លេ Tammerkoski នៅហ្វាំងឡង់ផ្ទាល់តែម្ដង។ រហូតដល់ឆ្នាំ 1868 Idestam បានពង្រីកទីតាំងក្រុមហ៊ុនរបស់ខ្លួនមួយកន្លែងទៀតនៅជិត ទីក្រុង Nokia គឺចម្ងាយ 15គីឡូម៉ែត្រពីទន្លេ Nokianvirta ហើយក្រោយមកនៅឆ្នាំ 1871 គាត់និងអតីតគ្រូជិតស្និទ្ធម្នាក់គឺលោក Leo Mechelin បានប្ដូរឈ្មោះក្រុមហ៊ុនមក Nokia ដោយយកឈ្មោះតាមឈ្មោះទីក្រុង Nokia រហូតដល់សព្វថ្ងៃ។
ចាប់ពីឆ្នាំ 1898 មកក្រុមហ៊ុន Nokia ទទួលបានប្រជាប្រិយភាពគួរសម ជាក់ស្ដែងមានក្រុមហ៊ុនពីរបានរំលាយខ្លួនបញ្ចូលជាមួយ Nokiaគឺ Finnish Rubber Works និង Finnish Cable Works ហើយចាប់ពីឆ្នាំ 1967 Nokiaបានក្លាយជាក្រុមហ៊ុនសាជីវកម្មផ្លូវការ។
ការផលិតទូរស័ព្ទដំបូង
នៅក្នុងកំឡុងទសវត្សរ៍៦០ ក្រុមហ៊ុនបានផលិតបច្ចេកវិទ្យាទូរគមនាគមន៍សម្រាប់យោធាដូចជា បណ្ដាញវិទ្យុទាក់ទងជាដើម។ នៅឆ្នាំ 1964 Nokia ផលិតបានវិទ្យុ VHF ដំណាលគ្នានឹងក្រុមហ៊ុន Salora Oy ដែរ។ ក្រោយមកក្រុមហ៊ុនទាំងពីរបានសហការគ្នាផលិតទូរស័ព្ទសម្រាប់ដាក់ ក្នុងឡាន ARP ។
នៅឆ្នាំ 1979
ក្រុមហ៊ុនទាំងពីរបានបញ្ចូលគ្នាជាក្រុមហ៊ុនតែមួយ
ហើយនៅឆ្នាំ1987
Nokiaទទួលបានជោគជ័យក្នុងការផលិតទូរស័ព្ទដៃដំបូងដែលមានឈ្មោះ
ថា Mobira Cityman 900។
នៅឆ្នាំ 2004 Nokia បានបង្ហាញទូរស័ព្ទម៉ូដែល Touchscreenដំបូងម៉ាក 7710 ដែលទទួលបានជោគជ័យយ៉ាងសំបើម។នៅឆ្នាំ 2007 Nokia 1100 គឺជាម៉ូដែលទូរស័ព្ទដែលទទួល បានការពេញនិយម និងលក់ដាច់ជាងគេបំផុត ដោយគិតចាប់ពីឆ្នាំ 2003 ដល់ 2007 លក់បានជាង 200 លានគ្រឿង។
ចំណូល
បច្ចុប្បន្ន Nokia មានទ្រព្យសកម្មសរុបជាង 35 ពាន់លានអឺរ៉ូហើយប្រាក់ចំណូលសរុបគិតត្រឹមឆ្នាំ 2009 មាន 40.99 ពាន់លានអឺរ៉ូ។ Nokia មានក្រុមហ៊ុនសាខាជាច្រើនទៀតដូចជា Nokia Siemens Networks, Navteg, Symbian, Vertu និង Qt Development Frameworks ជាដើម។
Logo
ចំពោះការប្រើប្រាស់ Logo វិញ Nokia មិនមែនប្រើ Logo ដូចសព្វថ្ងៃទេ។ នេះជាដំណាក់កាលនាំការផ្លាស់ប្ដូរស្លាកសញ្ញារបស់Nokia
Logo ដំបូងបង្អស់នៅឆ្នាំ 1871
Logo ចន្លោះឆ្នាំ 1965-1966
Logoទី បី រូបរាងថ្មី
ប្រើប្រាស់ជាផ្លូវការនៅឆ្នាំ 1992
ដាក់ឲ្យប្រើប្រាស់នៅឆ្នាំ 2006
សព្វថ្ងៃក្រុមហ៊ុន Nokia មាន ថ្នាក់ដឹកនាំធំៗចំនួន ១៨ ប្រចាំនៅតំបន់សំខាន់ៗ ព្រមទាំងមានបុគ្គលិកទាំងអស់ចំនួន ១៣០ ០០០នាក់គ្រប់សាខាជុំវិញពិភពលោក៕
ប្រវត្តិសង្ខេបរបស់Leo Mechelinស្ថាបនិក Nokia
ក្នុងទំព័រនេះ Sabay សូមពាំនាំយកនូវប្រវត្តិសង្ខេបរបស់លោក Leo Mechelin ដែលជាមនុស្សតែម្នាក់គត់ដែលនឹកឃើញ និងជ្រើសរើស ឈ្មោះ Nokia ដំបូងបង្អស់ ជំរុញឲ្យក្រុមហ៊ុនទូរគមនាគមន៍ Nokia បន្តប្រើប្រាស់ Brand Name នេះ និងមានកេរ្តិ៍ឈ្មោះល្បីរន្ទឺដូចសព្វថ្ងៃនេះ។ជីវិតឯកជន និងក្រុមគ្រួសារ
Leo Mechelin តាមពិតទៅគ្រាន់តែជាឈ្មោះក្រៅតែប៉ុណ្ណោះ ឈ្មោះពេញរបស់គាត់គឺ Leopold (Leo) Henrik Stanislaus Mechelin។ Mechelin ចាប់បដិសន្ធិនៅថ្ងៃទី ២៤ វិច្ឆិកា ឆ្នាំ ១៨៣៩ នៅទីក្រុង Hamina ប្រទេសហ្វាំងឡង់ និងទទួលមរណភាពនៅវ័យ ៧៥ឆ្នាំ គឺចំថ្ងៃទី ២៦ មករា ឆ្នាំ ១៩១៤ នៅទីក្រុង Helsinki ។ ឪពុករបស់លោកមានឈ្មោះថា Gustaf Johan Mechelin និងលោកស្រី Amanda Gustava Costiander ជាម្ដាយ។
អំពីក្រុមហ៊ុន Nokiaក្រុមហ៊ុន Nokia ត្រូវបានលេចចេញជារូបរាង និងស្លាកសញ្ញា Nokia នៅឆ្នាំ១៨៧១ ជាមួយនឹងសិស្សសំណព្វរបស់លោកម្នាក់ទៀតគឺ Fredrik Idestam។ ចំពោះស្លាកសញ្ញារបស់ ក្រុមហ៊ុន Nokia វិញគឺមិនមានលក្ខណៈដូចសព្វថ្ងៃនោះទេ គឺឆ្លងកាត់នូវ ៥ដំណាក់កាល។
ការអប់រំ
នៅឆ្នាំ ១៨៦០ Leo Mechelin បាន បញ្ចប់ថ្នាក់បរិញ្ញាបត្រ ហើយបន្តថ្នាក់បណ្ឌិតរងផ្នែក ទស្សនវិជ្ជា។ ប៉ុន្តែនៅឆ្នាំ ១៨៦៤ លោកមិនបានបន្តថ្នាក់បណ្ឌិតភ្លាមទេ លោកបែរជាសិក្សាផ្នែកច្បាប់កំរិត បរិញ្ញាបត្រ ព្រមទាំងបញ្ចប់ថ្នាក់បណ្ឌិតឆ្នាំ ១៨៧៣ នៅសាកលវិទ្យាល័យ Helsinki ផ្ទាល់ តែម្ដង។ បណ្ឌិតរូបនេះក៏បានចាប់យកអាជីព ជាសាស្ត្រាចារ្យជំនាញកាត់ក្ដី និង នយោបាយ។ លោកធ្លាប់ធ្វើជាព្រឹទ្ធបុរសសាកលវិទ្យាល័យ Art And Design Helsinki និង សាកលវិទ្យាល័យFinnish Art Societyថែមទៀតផង ។
រូបសំណាករបស់Mechelin នៅខាងមុខHouse of Estate ក្រុងHelsinki ប្រទេសហ្វាំងឡង់
នៅឆ្នាំ ១៨៨០-១៨៨៥លោកបានបង្កើតគណបក្ស សេរីនិយម ហ្វាំងឡង់ ព្រមទាំងបានជាប់ឈ្មោះជាប្រធានក្រុមប្រឹក្សាប្រចាំទីក្រុង Helsinki ពីរសម័យកាលគឺ ចន្លោះពីឆ្នាំ ១៨៧៥-១៨៧៦ និង ១៨៩២-១៨៩៩ ។ ទន្ទឹមគ្នានេះដែរ លោកក៏ត្រូវបានតែងតាំងជា អ្នកជំនាញផ្នែកនយោបាយ និងជាសមាជិកជាន់ខ្ពស់ នៃដំណើរឆ្ពោះទៅកាន់សន្តិភាពជាសកល។
ក្នុងនាមជាអ្នកនយោបាយមួយរូប ប្រកបដោយសមធម៌ មេដឹកនាំរូបនេះផ្ដល់ការគោរព រាប់អានដល់គ្រប់គណបក្ស និងប្រជាជនទាំងអស់ របស់ហ្វាំងឡង់។ ជាក់ស្ដែង ក្រោយពីរំលាយ គណបក្ស សេរីនិយម ហ្វាំងឡង់របស់ខ្លួននៅឆ្នាំ ១៨៨៥មក Mechelin មិនបានចូលរួមជាមួយគណបក្សផ្សេងឡើយ។
Mechelin បានជាប់ឈ្មោះជារដ្ឋាភិបាលហ្វាំងឡង់ កាន់កាប់អំណាចបានបីឆ្នាំ ចន្លោះពីឆ្នាំ ១៩០៥-១៩០៨ ហើយលោកជាបុគ្គលទីមួយសម្រាប់ប្រទេសនេះ និងពិភពទាំងមូលដែលបានសាបព្រោះនូវរបបគ្រប់គ្រង បែបលទ្ធិប្រជាធិបតេយ្យ គឺប្រើប្រាស់ការបោះឆ្នោតដើម្បីជ្រើសតាំងមេដឹកនាំ។ ក្រោមការដឹកនាំរបស់ Mechelin លោក បានបើកយ៉ាងទូលាយនូវ វប្បធម៌លទ្ធិប្រជាធិបតេយ្យ សេរីភាពក្នុងការបញ្ចេញមតិ និងសេរីភាពប្រព័ន្ធផ្សព្វផ្សាយសារព័ត៌មាន ទៅដល់ប្រជាជនហ្វាំងឡង់ទាំងមូល។
ស្ថិតក្រោមការកាន់អំណាចរបស់ Mechelin នៅ ឆ្នាំ ១៩០៧ មានការបោះឆ្នោតជ្រើសតាំង សមាជិកសភាជាសាកល ក្នុងចំណោម សមាជិកសរុប ២០០នាក់ ដែលក្នុងនោះមានស្ត្រីចំនួន ១៩រូប។ ក្រោយពីមរណភាពMechelin នៅ ឆ្នាំ ១៩១៤ ដោយមានការជ្រោមជ្រែងរបស់ មិត្តរួមការងារក្រោមបង្គាប់ ដឹកនាំបដិវត្តន៍ធំៗចំនួនពីរជាប់ៗគ្នានៅរុស្ស៊ី ទើបរុស្ស៊ី សម្រេចប្រគល់ឯករាជ្យ ទាំងស្រុងដល់ ហ្វាំងឡង់ នៅឆ្នាំ ១៩១៧៕
No comments:
Post a Comment