ដើម​កំណើត​រថយន្តRange Rover

Range Rover គឺ​ជា​ប្រភេទ​រថយន្ត​ប្រណិត ​ខ្នាត​ធំ​ដែល​ដំណើរ​ការ​ដោយ​កង់​ទាំង​បួន (four-wheel drive) ប្រភេទ sport utility vehicle (SUV) ផលិត​ដោយ​ក្រុមហ៊ុន​ផលិត​រថយន្ត​ដ៏​ល្បី​របស់​អង់គ្លេស​ដែល​មាន​ឈ្មោះ​ថា Land Rover។ តែ​ក្រោយ​មក​បាន​លក់​ក្រុមហ៊ុន​ទាំង​មូល​ទៅ​ឲ្យ​ក្រុមហ៊ុន​ផលិត​រថយន្ត​ ឥណ្ឌា​ឈ្មោះ​ថា​ Tata Motors នៅ​ថ្ងៃ​ទី ២៦ មិនា ឆ្នាំ ២០០៨។ រថយន្ត​ប្រណិត​នេះ​ចេញ​លក់​ដំបូង​ក្នុង​ឆ្នាំ ១៩៧០ និង​បាន​ចេញ​លក់​ជា​បន្តបន្ទាប់​ពី​ជំនាន់​ទី១​រហូត​ដល់​ជំនាន់​ទី៤ មាន​ឈ្មោះ​ថា Range Rover (L405)។

Range Rover គឺ​ជា​រថយន្ត​ម៉ាក​ល្បី​ដែល​មាន​តម្លៃ​ខ្ពស់​ស្ថិត​ក្រោម​ការ​គ្រប់គ្រង​និង ​ផលិត​ដោយ​យក​ចិត្ត​ទុកដាក់​ពី​សំណាក់​ក្រុមហ៊ុន Land Rover និង​បាន​បែងចែក brand ​ពីរ​ធំៗ​បន្ថែម​ទៀត​គឺ Range Rover Evoque និង Range Rover Sport។

Range Rover Evoque Dynamic ស៊េរី​ឆ្នាំ​២០១២

ប្រវត្តិ៖

- ក្នុង​ឆ្នាំ ១៩៦៧ គំរូ​រថយន្ត Range Rover ដំបូង​បំផុត​បាន​លេច​ចេញ​ជា​រូបរាង​ឡើង​ជាមួយ​នឹង​រូបរាង​បែប​សាមញ្ញ​រួម​ ជាមួយ​រូប​សណ្ឋាន​ចម្រឹង​ដែក​ខាង​មុខ​ដែល​ប្លែក​ពី​រថយន្ត​ម៉ាក​ផ្សេងៗ​ហើយ​ ផ្សំ​ជាមួយ​ចង្កៀង​មុខ​រាង​មូល។ ការ​ឌីហ្សាញ​រូបរាង រថយន្ត Range Rover ដំបូង​នេះ​ត្រូវ​បាន​បញ្ចប់​ជា​ស្ថាពរ​ក្នុង​ឆ្នាំ ១៩៦៩។
- Range Rover ដំបូង​បំផុត​នេះ​បាន​បង្ហាញ​ខ្លួន​ឲ្យ​សាធារណៈ​ជន​ឃើញ​ក្នុង​ឆ្នាំ ១៩៧០។ ដើម​ឆ្នាំ​ដដែល​នេះ​សារមន្ទីរ​ធំ​ជាង​គេ​លំដាប់​ពិភពលោក​របស់​បារាំង​ដែល​ មាន​ទីតាំង​នៅ​ទីក្រុង​ប៉ារីស​ឈ្មោះ​ថា Musée du Louvre បាន​ជ្រើសរើស​យក​រថយន្ត​ដំបូង​នេះ​ទៅ​ដាក់​តាំង​ពិព័រណ៍​នៅ​ក្នុង​សារមន្ទីរ ​របស់​ខ្លួន​ដើម្បី​បង្ហាញ​ពី​ស្នាដៃ​គំរូ​នៃ​ឧស្សាហកម្ម​នៃ​ការ​ច្នៃ​ម៉ូត​ ដែល​អាច​ហៅ​ជា​ភាសា​អង់គ្លេស​ថា “exemplary work of industrial design”។
- មុន​ឆ្នាំ ១៩៨៧ រថយន្ត​គ្រប់​ម៉ាក​ដែល​ផលិត​ដោយ​ក្រុមហ៊ុន Land Rover មាន​ដាក់​លក់​នៅ​ក្នុង​សហរដ្ឋអាមេរិក​តែ​មួយ​គត់​តាមរយៈ​ទីផ្សារ​ដោះដូរ​មួយ ​ឈ្មោះ​ថា grey market បន្ទាប់​មក​ក្រុមហ៊ុន​អង់គ្លេស​មួយ​នេះ​បាន​ចាប់​ផ្ដើម​ដាក់​លក់ Range Rover ជា​ផ្លូវការ​នៅ​ក្នុង​សហរដ្ឋអាមេរិក​នៅ​ថ្ងៃ​ទី​១៦ ខែ មិនា ឆ្នាំ ១៩៨៧។
- ចាប់​តាំង​ពី​ឆ្នាំ ១៩៨៧ រហូត​ដល់ ១៩៩៣ កេរ្តិ៍ឈ្មោះ​របស់ Range Rover ទទួល​បាន​ការ​ចាប់​អារម្មណ៍​និង​ល្បី​រន្ទឺ​ក្នុង​ទីផ្សារ​រថយន្ត​របស់​ អាមេរិក​ព្រោះ Range Rover គឺ​ជា​រថយន្ត​តែ​មួយ​គត់​ដែល​ក្រុមហ៊ុន Land Rover បញ្ចេញ​លក់​នៅ​ក្នុង​ទីផ្សារ​អាមេរិក។
- ឈាន​ចូល​ដល់​ឆ្នាំ ១៩៩៣ បន្ទាប់​ពី​ទទួល​បាន​ភាព​ជោគជ័យ​លើ​ការ​ដាក់​លក់ Range Rover នៅ​ទីផ្សារ​អាមេរិក ក្រុមហ៊ុន Lange Rover បាន​នាំ​យក​រថយន្ត​ម៉ាក​ថ្មី​របស់​ខ្លួន​ចំនួន​ពីរ​ស៊េរី​ទៀត​គឺ Defender 110 និង Land Rover Discovery ដើម្បី​វាយ​លុក​ទីផ្សារ​រថយន្ត​អាមេរិក​ស្ថិត​ក្រោម​ស្លាក​សញ្ញា “Land Rover North America”។
- ក្នុង​ឆ្នាំ ២០០៥ Land Rover បាន​ចេញ​លក់ brandរថយន្ត Range Rover ថ្មី​មួយ​ទៀត​ឈ្មោះ​ថា Range Rover Sport ដែល​យក​គំរូ​តាម​រថយន្ត Land Rover Discovery។
- បន្ទាប់​មក​ឆ្នាំ ២០១១ Land Rover បាន​បង្ហាញ brand រថយន្ត Range Rover ស៊េរី​ចុង​ក្រោយ​មួយ​ទៀត​ដែល​មាន​ឈ្មោះ​ថា Range Rover Evoque។
ជំនាន់​របស់ Range Rover៖
- Range Rover ជំនាន់​ទី​មួយ​មាន​ឈ្មោះ​ថា Range Rover Classic   (១៩៧០-១៩៩៦)
Range Rover ជំនាន់​ទី​មួយ​ផលិត​ក្នុង​ចន្លោះ​ឆ្នាំ ១៩៧០ និង ១៩៩៦ ជា​រថយន្ត​ប្រភេទ Classic មាន​រូបរាង​ស្រដៀង​នឹង​ឡាន Jeep Wagoneer របស់​អាមេរិក។ រថយន្ត​ដដែល​នេះ​បាន​បំពាក់​មក​ជាមួយ​ម៉ាស៊ីន​ប្រភេទ Rover V8 ជាមួយ​កម្លាំង​ម៉ាស៊ីន 135 hp។

Range Rover Classic

- Range Rover ជំនាន់​ទី​ពីរ​ឈ្មោះ​ថា Range Rover (P38A) (១៩៩៤-២០០២)
Range Rover ជំនាន់​ទី​ពីរ​បាន​បង្ហាញ​ខ្លួន​ក្នុង​ឆ្នាំ ១៩៩៥ ជាមួយ​នឹង​កំណែ​រូបរាង​ថ្មី​ព្រម​ជាមួយ​នឹង​ការ update ម៉ាស៊ីន Rover V8ថ្មី​ដើម្បី​ប្រកួតប្រជែង​ទីផ្សារ​រថយន្ត​ប្រភេទ SUV។ រថយន្ត​ជំនាន់​ទី​ពីរ​នេះ​គឺ​ជា​រថយន្ត​ដំបូង​បំផុត​របស់​ក្រុមហ៊ុន Range Rover ដែល​បាន​ភ្ជាប់​មក​ជាមួយ​ប្រព័ន្ធ Diesel injection ព្រម​ជាមួយ​នឹង​ការ​គ្រប់គ្រង​និង​បញ្ជា​បែប​អេឡិចត្រូនិក។

Range Rover (P38A)

- Range Rover ជំនាន់​ទី​បី​ឈ្មោះ​ថា Range Rover (L322) (២០០២-២០១៣)
Range Rover ជំនាន់​ទី​បី​បាន​បង្ហាញ​ខ្លួន​ក្នុង​ឆ្នាំ ២០០២ ស្ថិត​ក្រោម​គម្រោង​សហការ​ផលិត​ជាមួយ​ក្រុមហ៊ុន​ផលិត​រថយន្ត BMWរបស់​អាល្លឺម៉ង់​ដើម្បី​ចែករំលែក​សមាសធាតុ​ផ្សំ​និង​ប្រព័ន្ធ​ អេឡិចត្រូនិក​ពី​រថយន្ត BMW ម៉ាក 7 Series។ រថយន្ត​ជំនាន់​ទី​បី​នេះ​បាន​បំពាក់​មក​ជាមួយ​ម៉ាស៊ីន M62 V8 របស់ BMW ព្រម​ជាមួយ​នឹង​ការ​ផ្លាស់​ប្ដូរ​ប្រព័ន្ធ​ចាស់ៗ​ដែល​ប្រើ​ដោយ​ដៃ​ទៅ​ប្រើ​ ដោយ​ស្វ័យប្រវត្តិ​ទាំងអស់។

Range Rover (L322)

- Range Rover ជំនាន់​ទី​បួន​ឈ្មោះ​ថា Range Rover (L405)
ឈ្មោះ​របស់ Range Rover ជំនាន់​ចុង​ក្រោយ​នេះ​បាន​​បង្ហាញ​ខ្លួន​នៅ​លើ​គេហទំព័រ Land Rover ក្នុង​ខែ​សីហា ឆ្នាំ ២០១២ កន្លង​ទៅ​ថ្មីៗ​នេះ តែ​ក្រុមហ៊ុន​មិន​បាន​បង្ហាញ​រូប​និង​ព័ត៌មាន​លម្អិត​ពី​រថយន្ត​ស៊េរី​ចុង​ ក្រោយ​នេះ​នៅ​ឡើយ​ទេ​ព្រោះ​លក្ខណសម្បត្តិ​និង​រូបរាង​ពិត​នឹង​បង្ហាញ​នៅ​ ក្នុង​ពិព័រណ៍ Paris Motor Show នា​ខែ កញ្ញា ឆ្នាំ​២០១២ ខាង​មុខ​នេះ។
ក្រៅ​ពី Range Rover ទាំង​បួន​ជំនាន់​ខាង​លើ​នេះ ក្រុមហ៊ុន Land Rover បាន​ផលិត​និង​ចេញ​លក់ brand Range Rover ចំនួន​ពីរ​បន្ថែម​ទៀត​គឺ៖
- Range Rover Sport ៖
ក្រុមហ៊ុន Land Rover បាន​បង្ហាញ​រូបភាព​ដំបូង​របស់ Range Rover Sport នៅ​ថ្ងៃ​ទី ២៦ ខែ​វិច្ឆិកា ឆ្នាំ ២០០៤។ បន្ទាប់​មក​ក្រុមហ៊ុន​បាន​យក​រថយន្ត​ស៊េរី​ថ្មី​នេះ​ទៅ​ដាក់​តាំង​បង្ហាញ​ ជូន​សាធារណជន​លើក​ទី​មួយ​នៅ​ពិព័រណ៍ North American International Auto Show ក្នុង​ឆ្នាំ ២០០៥។ រថយន្ត​ដដែល​នេះ​បាន​ចេញ​លក់​ជា​ផ្លូវការ​កាល​ពី​ចុង​ឆ្នាំ ២០០៥ តែ​ក្រុមហ៊ុន​បាន​ចាត់​រថយន្ត​នេះ​​ចូល​ក្នុង​ស៊េរី​ឆ្នាំ ២០០៦។

Range Rover Sport

- Range Rover Evoque៖
ក្រុមហ៊ុន Land Rover  បាន​ផលិត​រថយន្ត​ស៊េរី​ក្រោយ​នេះ​ក្នុង​ខែ កក្កដា ឆ្នាំ​២០១១ ដោយ​យក​តាម​គំរូ​រថយន្ត Land Rover LRX (ជា​គំរូ​រថយន្ត​ដែល​មិន​ទាន់​ចេញ​លក់)។ រថយន្ត​ស៊េរី​ក្រោយ​នេះ​បាន​បែងចែក​ជា​ច្រើន​ប្រភេទ​សម្រាប់​ឲ្យ​អតិថិជន​ ជ្រើសរើស​ដូច​ជា៖ Evoque ទ្វារ​បី ឬ  Evoque ទ្វារ​ប្រាំ, វិល​កង់​មុខ​ពីរ ឬ​វិល​កង់​ទាំង​បួន  និង​ម៉ាស៊ីនturbocharged ចំណុះ ២លីត្រ ឬ​ម៉ាស៊ីន turbo-diesel ចំណុះ ២,២លីត្រ។

Range Rover Evoque

កាល​ពី​ចុង​ឆ្នាំ ២០១១ កន្លង​ទៅ​នេះ Sabay ធ្លាប់​បាន​ចុះ​ផ្សាយ​ម្ដង​រួច​មក​ហើយ​ពី​ម៉ូដែល​រថយន្ត Range Rover Evoque Dynamic ស៊េរី​ឆ្នាំ​២០១២ ដែល​ដំណើរការណ៍​ដោយ​ម៉ាស៊ីន​​ប្រភេទ Twin-turbocharged​ ផ្ដល់​ថាមពល​ខ្ពស់ និង​មាន​សន្ទុះ​លឿន។ បច្ចុប្បន្ន​រថយន្ត​ម៉ូដែល​នេះ មាន​ដាក់​លក់​នៅ​លើ​ទីផ្សារ​ប្រទេស​កម្ពុជា​យើង​តាមរយៈ​ក្រុមហ៊ុន អ៊ីនវូតិក ខូលអិលធីឌី។

Overfinch​ច្នៃរថយន្ត​ដើម​Range Rover ​ពីរ​ម៉ូត 

កាល​ពី​សប្ដាហ៍​កន្លង​ទៅ​នេះ Overfinch ជា​ក្រុមហ៊ុន​ជំនាញ​ខាង​កែប្រែ​រូបរាង​ថ្មី​ឲ្យ​រថយន្ត Range Roverដែល​មាន​មូលដ្ឋាន​ធំ​នៅ Yorkshire ចក្រភព​អង់គ្លេស​បាន​ប្រកាស​ថា ខ្លួន​នឹង​ដាក់​តាំង​បង្ហាញ​រថយន្ត Range Rover ស៊េរី​ថ្មី​ចំនួន​ពីរ​ស៊េរី ​បន្ទាប់​ពី​ខ្លួន​បាន​កែច្នៃ​​លើ​រថយន្ត​ដើម​គឺ Range Rover Sport GTS-X និង Range Rover Evoque 2012 GTS ដើម្បី​ដាក់​បង្អួត​ក្នុង​ព្រឹត្តិការណ៍​មួយ​ឈ្មោះ​ថា Salon Privé 2012 ដែល​នឹង​ប្រព្រឹត្ត​ទៅ​​​ទីក្រុង​ឡុងដុង​នា​ថ្ងៃ​ទី ៥ កញ្ញា ២០១២ ខាង​មុខ​នេះ។

Range Rover Sport GTS-X តម្លៃ​ប្រហែល ២៣​ម៉ឺន​ដុល្លារ អាមេរិក

ព្រឹត្តិការណ៍​តាំង​បង្ហាញ​រថយន្ត​ ថ្មី​ទាំង​ពីរ​ស៊េរី​នេះ​នឹង​ប្រព្រឹត្ត​ទៅ​ចំនួន​បី​ថ្ងៃ​គឺ​ចាប់​ពី​ថ្ងៃ​ ទី ៥ រហូត​ដល់​ទី ៧ ខែ​កញ្ញា នៅ Syon Park ភាគ​ខាង​លិច​ទីក្រុង​ឡុងដុង​ក្នុង​ព្រឹត្តិការណ៍ Salon Privé 2012 ដែល​ធ្វើ​ឡើង​ដើម្បី​ដាក់​តាំង​បង្ហាញ​ផលិតផល​ល្បីៗ​ជា​ច្រើន​ដូច​ជា៖ រថយន្ត​ម៉ាក​ល្បី​ៗ​​មក​ពី​ទូទាំង​ពិភពលោក, គ្រឿង​អលង្ការ, សិល្បៈ​ខាង​ធ្វើ​នាឡិកា, បច្ចេកវិទ្យា និង​ផលិតផល​ល្បី​ៗ​ជា​ច្រើន​មុខ​ទៀត។

Range Rover Evoque 2012 GTS តម្លៃ​ប្រហែល ១៤ម៉ឺន​ដុល្លារ​អាមេរិក

Sport GTS-X បាន​ភ្ជាប់​មក​ជាមួយ​កម្លាំង​ម៉ាស៊ីន 575 horsepower ជាមួយ​នឹង​ម៉ាស៊ីន​ចំនួន ៨ (V8) ដែល​ធ្វើ​ឲ្យ​រថយន្ត​នេះ​មាន​អនុភាព​ខ្លាំង​និង​អាច​រត់​ក្នុង​ល្បឿន​លឿន​ រហូត​ដល់ ២៣៣​គីឡូម៉ែត្រ​ក្នុង​មួយ​ម៉ោង។ តែ​ក្រុមហ៊ុន​មិន​បាន​បញ្ជាក់​ពី​កម្លាំង​ម៉ាស៊ីន​និង​ល្បឿន​របស់  Evoque 2012 GTS នោះ​ទេ។

យ៉ាងណាមិញ Overfinch មិន​បាន​ប្រាប់​លក្ខណៈ​សម្បត្តិ​​លម្អិត​​នៃ​រថយន្ត​ទាំង​ពីរស៊េរី​​ខាង​លើ​ នៅ​​​ឡើយ​ទេ ​ព្រោះ​អ្វីៗ​នឹង​ត្រូវ​បាន​លាតត្រដាង​នៅ​ក្នុង​កម្មវិធី​ខាង​លើ​នា​ខែ​ ក្រោយ​នេះ។ តែ​ក្រុមហ៊ុន​បាន​បញ្ជាក់​ថា Range Rover Sport GTS-X មាន​តម្លៃ​ជាង ២៣​ម៉ឺន​ដុល្លារ​អាមេរិក ចំណែក  Range Rover Evoque 2012 GTS មាន​តម្លៃ​ជាង ១៤ម៉ឺន​ដុល្លារ​អាមេរិក៕